فرحة العمر

ومشيت عليّ وخلّيتني , لا سمعتني ولا سمّعتني…..خلّيتني في غصرتي وحدي ……في غصّتي وحدي…….في غرقتي وحدي …لبّسوني حكاية خاطيتني وقدّاش شهيتك تلبسني….
لبّسوني فرحة العمر ,غرقوني في الكحّل…بلْحطوني……..بلْحطوني ….بلْحطوني……….مشي في بالهم زينوني………هزّوني من يدّي وحطّوني بحّذا اتقول انت رجلي…رجْلة…رجْمة..رجّة
…راجلي…….راجلي…
قعّدوني حاشمة بالسّيف………نخزر لانواع الهزّان……نتفرّج في البدع الوان……..والشطيح والشطيح والشطيييييييح الي هكة والى هكة والى هكة ……………
العاشرة احترام النائم……..جابو المصوّر وصوّروني
ورّي سياغتك (همْ) ……ورّي روبتك(همْ)………..ورّي مشطّك (همْ) ..ورّي حنّتك (همْ) ……ورّي نقشتك (همْ)………….ورّي فرحتك بالجوْ العايلي……..فرحتك بالفاميلا الجديدة……..وبأمْ امْ امْ امْ امْ …….أمّو’ أمّو’…..
آزح…ما اتنجموش تتصورو قداش كنت باش انموت بالفرحة كنت كنت
كنت باش انموت بالفرحة ,بالعمل حسّيت خواطري دارت مل الفرحة..ركايبي ترعش ولوني مخطوف…كُبــُبْ مخبّلَة…مفرّتة…مبعثرة..فُيّ اللّداخل ومَا ينجّم يكون كان من الفرحة ظاهرة العمليّة خصوصي كي اتشدّك غصّة وتشهى تقّدف ….تردّ…تتمدّ …تبلع…تموت….تهرب ….تهرب…..تهرب….العمليّة واضحة ما اتنجم اتكون كان فرحة العمر امالا علاش سموها فرحة العمر…….ماهو على خاطر بالرّسمي تحسّ روحك باش اتّموت من الفرحة.